90後生活日誌

就黎結婚既朋友仔，小妹都建議你地去做婚前檢查，查下自己身體狀況，有咩問題可以及早治療，而且知道自己下一代會唔會有什麼遺傳病。 小妹係婚展都見過有好多間醫護中心提供基本套餐，費用二人價都只係千幾蚊。如果你想要進一步深入調查，可以加錢升級。由於小妹係網上爬文睇到呢D醫護中心服務麻麻地，加上去到又會叫你升級加錢，所以小妹最後都係撰左家計會。 大家可以上家計會 https://www.famplan.org.hk/zh/our-services/clinic-services/pre-marital-fertility-preparation/pre-marital-check-up/content 睇下自己個人需要，小妹就只係選左基本加護士講解，2人收費係1380。 預約：家計會有網上預約/電話預約，小妹同另一伴都係星期六先得閒，所以大家要問下職員邊一間診所星期六有開 （每間長短周時間不同) 小妹就撰左荃灣南豐中心診所 第一次上去：基本上呢一次上去就係做簡單既登記，問下你自己個人身體狀況，然後就比錢，記得只收現金或EPS，之後姑娘就比紙仔你去附近診所做抽血測試。完成後，姑娘會比個精液收集瓶比你，記得要約睇報告前2星期就好去提交樣本。樣本收集有3個地方，由於收集後要1.5小時送到化驗所，所以大家要撰間近自己屋企既。 第二次上去：姑娘會比PH試紙你出去廁所驗下尿液有有問題，之後比姑娘睇完就OK。然後就可以坐係到等叫名睇報告，男同女是分開聽報告的，入房姑娘都會問你身體狀況，然後度高磅重量血壓，最後就傾下報告有咩問題。去到呢到先發覺份報告醫生都會睇，如果有咩REMARK醫生都會寫低，姑娘再同你講返。不過我地走左先記得姑娘冇做避孕指導⋯⋯可能做左都唔知，因為好快帶過。

前言：最近真係太忙了，買樓結婚同時做係咩玩法？！好彩而家買樓都差唔多搞掂晒，之後等律師再處理。而家終於有時間打BLOG同大家分享下。：) 上一篇文就教大家點樣搵自己心水盤，搵到之後就要約經紀去睇樓。(小妹個人係十分建議睇左樓先決定買唔買，如果業主話冇得睇，但價錢便，自己可以衝量下風險) 睇樓時間 小妹就盡量都會撰日頭時間去睇樓，因為可以睇清楚屋企既情況之外，仲可以睇下附近景觀，有沒有墓地等。至於上網話落雨睇樓仲好，因為可以睇到天花板有冇漏水情況。 睇樓比錢 記得記得唔洗比任何錢經紀同業主，睇樓唔應該要收任何錢。 睇樓紙 按正常做法，每睇一個單位經紀都會比一份睇樓紙你簽，內容主要講係如果你3個月內買入呢個單位，你就要向經紀付樓價1%既佣金。所以同一區記得MARK低自已睇左邊幾個單位，因為簽完睇樓紙後，如果經另一間地產購買同一單位，就要比2邊佣金。 樓宇外圍 如果你好似小妹咁買舊樓，去睇樓時可以留意下屋苑外牆有冇工程做緊，因為好多時屋苑維修都要業主夾錢 (業主立案法團唔夠錢)，或者同經紀問下做完大維修未，如果未，可能之後搬入又係一筆費用。 屋苑設施/大堂/LIFT/業主立案法團 屋苑設施可以問一問經紀帶你去睇下，之前小妹都見過有些屋苑有寫呢D設施但去到先發覺關閉左好耐。大堂都可以睇下保安員盡唔盡責，有幾多部LIFT等。如果來者訪客都唔登記，之後都幾擔心安全問題。至於LIFT 太少部/太慢，日頭趕時間返工都幾慘。另外，記得問一問屋苑管理費幾多，及法團有幾多盈餘。 單位走廊/內部 一出lift可以睇下一梯有幾多伙，然後走廊整唔整潔，之後可以睇下單位鐵閘/大門。一入屋，主要都係睇下D間格，天花板有冇漏水（會有水印)，洗手盤去水位有冇塞，外圍景觀等。當然如果你睇係有人住緊既樓，甚至是裝修好晒既樓，好難睇得出真實有咩問題。所以呢個都係買2手樓一個缺點。 以上就係小妹新手上車睇樓心得，可能都未夠完全，大家睇完樓後可以留言再同小妹分享下有咩注意事項～