90後生活日誌

一般新手上車，都需要做高成數按揭，借款額是樓宇價錢八到九成。由於高成數按揭(6成以上)都需要付按揭保費，保費通常是十幾萬以上。一般黎講新手上車都會加埋係借款額，所以相對黎講壓力測試同入息要求都會提高。而借咁大筆錢，你會搵邊幾間按揭銀行？ 小妹覺得可以分為以下幾方面因素考慮： 1. 銀行知名度 一般申請按揭通常都會搵四大銀行，HSBC/BOC/HANGSENG/SC，貪佢夠出名，有保障，話晒都借唔少錢。而且聽講大行好小係經濟差時會Call Loan，加上大行服務質素會比較好D。 2. 銀行現金回贈 每間銀行的現金回贈都是不同，而且贈送優惠都有出入，當然是以銀行出左Offer為準。不過大家可以去討論區爬文，或者親身去銀行問下有咩分別。現金回贈是你既借款額6成*Rebate，小妹果時去各大銀行問，基本上大行既Rebate都係比較低。那時小妹6月問，參考價是大行0.2-0.5%，而其他細行有1%。 3. 銀行出Offer時間 每間銀行基於自身內部運作，出既Offer時間都會唔同。如果你既成交日係好急，建議你同銀行講清楚你既成交日，等銀行比出專業建議。小妹試過去間細行問，佢根據成交期建議小妹都係搵返大行，因為佢地審批時間要成個半月。當然，如果你係成交期長，可以等下，但小妹相信每個新手上車既人一日未有Offer一日個心都未定。小妹就會寧願搵間快出Offer，可以有覺好訓。 4. 借款人出糧戶口 由於每月還錢比銀行，所以銀行出糧戶口都好影響，如果每個月將D錢轉來轉去都幾麻煩。如果公司肯的話，你都可以轉出糧戶口。唔係就撰其他非出糧戶口銀行每個月set auto transfer 過數比按揭銀行戶口。 講左咁多，小妹最後都係撰左四大銀行去做按揭。始於大行小妹都比較放心，而且大行批核時間都係一個月左右，比其他細行1.5-2個月已經算快。不過大家要記得按揭銀行最多搵3-4間就好，因為每搵一間，銀行查你既TU，對你既信貸評級有影響，而且銀行知道你申請太多間，都會覺得你撰佢地機會不大，從而對你份申請減慢進度。小妹建議可以撰2間大行，1間細行申請為策略。(基本上大行2-3星期已經有offer） 更新小妹既買樓進度，銀行果邊已經出左offer啦，而家一切都係等律師同銀行搞等收樓啦：）

通常係你簽完臨時買賣合約後，第一時間要做既係搵律師。因為係你簽完臨時買賣合約後14日內就要簽正式買賣合約加比大訂、印花稅律師樓。由對家草擬正式買賣合約，兩邊律師樓核對文件，買賣家簽文件等都要係14日內完成，所以時間都是分秒必爭。 一般黎講，經紀都會係簽完臨時買賣合約後介紹相熟律師行比你，收費大概比出名律師行便幾千蚊左右，小妹收到報價約6000蚊基本，加上2000蚊雜費(影印、註冊費等)，就係8000蚊左右完成整個樓宇買賣過程。好處就係，第一比出名律師行便，第二有咩問題都可以搵經紀叫佢跟緊D。由於係經紀介紹，佢一定會收律師行佣，所以睇你比唔比經紀賺。 至於小妹最後就撰左出名的律師行，整個收費大概是1萬左右。由於小妹上網爬文覺得便既律師行服務質素都係一分錢一分貨，話晒大拿拿攞幾百萬買樓，都唔想有任何差池，寧願比多幾千蚊希望做野跟足D。 不過無論大家點撰都好，都要問清楚銀行果間律師行係唔係on list，如果你要做按揭，唔係on list律師行銀行係唔承認嫁，分分鐘要比多幾千蚊「駁腳費」。小妹就問過經紀介紹果間，佢話on list，點知打去銀行問話唔係，最終果間律師行話係比駁腳費其他律師行代辦，雖然唔洗出駁腳費，但聽到咁，小妹已經唔係咁鐘意，所以都係自己撰間貴少少。 另外，小妹撰果間出名律師行原因都係佢分行遍佈港九新界，初初上討論區睇話撰間近公司附近，可以方便食飯時去簽文件，點知我地放飯時人地都放飯，冇呢支歌仔唱。如果真係要撰，點都係要請假，就撰間係屋企附近。唔洗小妹咁可憐放假都要返公司附近上律師行⋯⋯ 最後一點想講就係唔可以同對家撰埋同一家律師樓，小妹真係覺得好有緣，見到對家撰左小妹果間證婚律師行，因為小妹本身都打算撰呢間。所以要問下經紀對家律師樓既資料，先再撰定自家律師樓。 PS. 小妹最近都係home office，但前排都係忙住結婚買屋，好耐都冇更新過，而家銀行終於出左offer，剩返既野等律師搞掂，無意外就可以坐定定收樓啦。黎緊再同大家繼續分享買樓心得～